Ad

ಸರಕಾರೊರ್ದ್ ನನಲಾ ತಿಕ್ಕಂದಿನ ಅನುವು; ಆರ್ಥಿಕ ಸಂಕಷ್ಟೊಡು ಕುಡ್ಲ ವಿಶ್ವವಿದ್ಯಾನಿಲಯ

Mng
Photo Credit: Author

ಕುಡ್ಲ: ಕುಡ್ಲ ವಿಶ್ವವಿದ್ಯಾನಿಲಯೊದ ಅಡಿತ ನಾಲ್ ಘಟಕ ಕಾಲೇಜಿಲೆನ ಕಾರ್ಯ ನಿರ್ವಹಣೆಗ್ ಸರಕಾರೊರ್ದ್ ನನಲಾ ಅನುವು ತಿಕ್ಕುದುಜಿ. ಒಟ್ಟುಗು ಆರ್ಥಿಕ ಸಂಕಷ್ಟೊಲಾ ಇತ್ತಿನೆರ್ದಾವರ ತೂವೊನುನು ಬಂಗ ಪಂದ್ ವಿ.ವಿ. ಕುಲಾಧಿಪತಿ ರಾಜ್ಯಪಾಲೆರೆಗ್ ಅಂಚೆನೇ ಉನ್ನತ ಶಿಕ್ಷಣ ಸಚಿವೆರೆ ಗೇನೊಗು ಕನತ್‌ದ ಪಂದ್ ಕುಲಪತಿ ಪ್ರೊ| ಪಿ.ಎಲ್.ಧರ್ಮ ತೆರಿಪಾದೆರ್.

ಬನ್ನಡ್ಕ ಬೊಕ್ಕ ನೆಲ್ಯಾಡಿ ಕಾಲೇಜ್‌ಲು, ಕುಡ್ಲ ವಿ.ವಿ.ದ ಘಟಕ ಕಾಲೇಜ್, ಸಂಧ್ಯಾ ಕಾಲೇಜ್ ಏಳೆಣ್ಮ ವರ್ಸೊ‌ರ್ದು ನಡತೊಂದು ಬರೊಂದುಲ್ಲ. ಆಂಡ ನಾಲ್ ವರ್ಸೊದಿ್ರಂಚಿ ಐಕ್ಲೆನ ಸ್ಪಾಚ್ಯೂಯೇಟ್ಗ್ ಸರಕಾರೊದ ಅನು ತಿಕ್ಕದಿಜಿ. ಎ.15ಕ್ ಈ ಬಗೆಟ್ ಉನ್ನತ ಶಿಕ್ಷಣ ಇಲಾಖೆದ ಮುಖ್ಯ ಕಾರ್ಯದರ್ಶಿಗ್ಲಾ ಅನು ಕೇಂದ್ ಓಲೆ ಬರೆತ್ಂಡ್ ಪಂದ್ ಆರ್ ಪಂಡೆರ್.

ಕುಡ್ಲ ವಿ.ವಿ. ತನ್ನ ಆಂತರಿಕ ಸಂಪೊತ್ತುನು ಒಟ್ಟು ಮನ್ಪುನ ಶಕ್ತಿನ್ಲಾ ಕಲೆವೊಂದುಂಡು. ಪಾಕ ಕಾಲೇಜಿಲು ಆಟೋನೊಮಸ್ ಕಾಲೇಜಿಲಾದಿತ್ತದ್, ಅವೆರ್ದ್ ಫೀಸ್ ಬರೊಂದಿಜ್ಜಿ. ಕೋವಿಡ್‌ರ್ದ್ ಬೊಕ್ಕ ಸರಕಾರೊದ ಅನುದಾನಲಾ ತಿಕ್ಕೊಂದಿಜ್ಜಿ. ಉಂದೆತ ಒಟ್ಟುಗು ಈ ಘಟಕ ಕಾಲೇಜ್‌ನ ನಿರ್ವಹಣೆಲಾ ಬಂಗ ಆದಿತ್ತದ್, ಉಪನ್ಯಾಸಕೆರೆಗ್, ಸಿಬ್ಬಂದಿಲೆಗ್ ಮೂಜಿ-ನಾಲ್ ತಿಂಗೋಲುಗೊರ ಸಂಬಳ ಕೊರ್ಪುನ ಪರಿಸ್ಥಿತಿ ಬೈದ್ಂಡ್ ಪಂದ್ ಆರ್‌ ವಿವರಿಸದೆರ್.‌

ವಿ.ವಿ.ಗ್ ಆದಾಯ ಕೊರೊಂದಿತ್ತಿನ ದೂರ ಶಿಕ್ಷಣ ಕೇಂದ್ರೂನು ಸರಕಾರೊದ ಆದೇಶೋರ್ದಾವರ ಮುಚ್ಚಿದ್ಂಡ್. ಕುಡ್ಲ ವಿ.ವಿ.ದ ಆಂತರಿಕ ಸಂಪನ್ಮೂಲ ಕಾಲೇಜ್‌ಲೆನ ಫೀಸ್, ಸರ್ಟಿಫಿಕೆಟ್‌ರ್ದ್ ಬರ್ಪಿನ ಫೀಸ್ ಲೆಕ್ಕೆದವು. ಯುಜಿಸಿ ಪ್ರಾಜೆಕ್ಟ್‌ಲು, ಕೈಗಾರಿಕೆಲೆರ್ದ್ ಬರೊಂದಿತ್ತಿನ ಆದಾಯೊಲಾ ಕಮ್ಮಿ ಆತ್ಂಡ್. ಈ ಮಾತಾ ಇಸಯೊಲೆನ ಬಗೆಟ್ ಸರಕಾರೊದ ಗೇನ ಒಯ್ತಿದ್ಂಡ್. ಇತ್ತೆಗ್ ಕುಡ್ಲ ವಿ.ವಿ. ಕ್ಯಾಂಪಸ್‌ ಉಲಯಿ ಉಪ್ಪುನ ಘಟಕ ಕಾಲೇಜಿಡ್ ಈ ಸರ್ತಿದ ದಾಖಲಾತಿಗ್ ಅವಕಾಶ ಕೊರ್ಪುನ ದಿಟ್ಟಿಡ್ ವಿಧಾನಸಭಾ ಸ್ಪೀಕರ್‌ನ ಭರವಸೆದ ಮಿತ್ತ್ ಸುರು ಮಲ್ತ್ದ ಪಂದ್ ಆರ್ ಪಂಡೆರ್.

Ad
Ad
Ad